Progrock

Needlepoint:

Remnants of Light

Bjørn Klakegg, vokal, gitarar, hurdy-gurdy, fløyte og fele; Erlend Slettevoll, ymse tangentinstrument og vokal; Nikolai Hængsle, bass og vokal; Ola Øverby, trommer; Solveig Wang, vokal og klarinett (5,7); Ingrid Støylen Runde, vokal (5); Camilla Brun, vokal (5,6)
bjk music

Remnants of Light er den sjette plata til Needlepoint og den mest heilstøypte. Det vil seia, her er låtskrivaren og tekstforfattaren Bjørn Klakegg på sitt beste og mest inviterande, bandet spelar utsøkt med arrangement og eit lydbilete som snytt ut av den britiske progrockscenen på 1970-talet, tilsett ein liten skvett Beatles og Mahavishnu Orchestra.

Klakeggs prosjekt

Den truskuldige røysta til Klakegg er ein sentral del av uttrykket. Alt saman produsert på beste vis av Hængsle.

Dette er Klakeggs prosjekt, men Hængsle byrjar etter kvart å få ein betydeleg medeigarskap. Han er til og med hovudvokalist på «Where You Two Once Held Hands».

Dei ni songane ber alle tydeleg bumerket til Klakegg. Han har ein særeigen sans for melodi som kombinerer uskulda med tristessen.

Sentrallyrisk

Tekstane har i all hovudsak ein sentrallyrisk tematikk, men naturen er ofte motiv eller bakgrunn, og det gjev oss ei kjensle av at det heile går føre seg i eit fantasy-univers. Dette blir understreka av illustrasjonane til broren Rune. Han har prega omslag frå og med den tredje plata, Aimless Mary. I hendene på ein dyktig instruktør og liberettist kan Klakeggs musikalske verd bli ein eineståande musikal.

Fleire låtar har såkalla hitpotensial. Heile plata er lett tilgjengeleg. Dei improviserte delane er sterkt avgrensa, men ved dei høva Slettevoll slepp til, løftar musikken seg fleire hakk.

Lars Mossefinn

Lars Mossefinn er frilans journalist og fast jazzmeldar i Dag og Tid.