Festivalsamtale

Masato Suzuki og Leif Ove Andsnes:

Samtale om Bach

Kvinnherad kyrkje i Rosendal, fredag 9. august

For klassiskinteresserte gjev namnet Suzuki ikkje berre assosiasjonar til motorsyklar, bilar og påhengsmotorar. Den japanske cembalisten, organisten og dirigenten Masaaki Suzuki (fødd 1954) grunnla i 1990 Bach Collegium Japan. Med dette koret og barokkorkesteret har han markert seg som ein av verdas beste tolkarar av Bachs kyrkjekantatar, som han har spelt inn samtlege av på kring 50 album.

«I ei løe i Rosendal opplevde eg festivalsesongens konserthøgdepunkt.»

No er son hans, Masato Suzuki (fødd 1981), sjefdirigent for Bach Collegium Japan. Det var denne Suzukien som i helga vitja Rosendal Kammermusikkfestival, der han gav tre konsertar. Før konsertane førre fredag deltok han og Leif Ove Andsnes, festivalens kunstnarlege leiar, på arrangementet «Samtale om Bach» i Kvinnherad kyrkje. Men det me fekk, kan heller kallast «Samtale om Suzuki».

Trass i samtaleleiar Andsnes’ diskrete freistnader på å pensla tematikken inn mot det vesentlege, fortapte Masato Suzuki seg i anekdotar og halvplatte vitsar. Å introdusera Masato Suzuki som musikar, å høyra om oppveksten i ein erkemusikalsk familie og om utdanninga som førte han dit han er i dag – dette var for så vidt ein fin og oppklarande inngang til samtalen. Vitsane var då også stundom humringsverdige, for Suzuki er ein sjarmerande og lite sjølvhøgtideleg fyr. Men kunnskapane hans om Bach og røynslene med å omsetja notane til klingande musikk, dette fekk me berre glimt av. Gode ansatsar fanst, men dei blei ikkje gjennomførte.

Sjur Haga Bringeland

Sjur Haga Bringeland er musikar, musikkvitar og fast musikkmeldar i Dag og Tid.