Jazz

Torgrim Sollid:

Meson

Torgrim Sollid, trompet og vokal; Elin Rosseland og Ingeborg Gravem Sollid, vokal: Andreas Wildhagen, trommer. Roselyd

Med utgjevingane til prosjektbandet Søyr har Torgrim Sollid for alltid sikra seg ein plass i norsk jazz. Som primus motor i prosjektet Østerdalsmusikk (Mai, 1975) var han med på å skapa interesse for norsk folkemusikk i jazzkrinsar.

I dei seinare åra har Sollid vore mest oppteken med å undervisa, og med unnatak av dei to platene med Warne Marsh har han spelt inn lite med små band. Å runda 80 år kan vera eit passande høve til å gjera noko med dette.

Meson er ein type elementærpartikkel som tek del i sterke vekselverknader og som lett desintegrerer, kan Store norske leksikon fortelja. Sollid har såleis funne eit høveleg namn på plata. Ved første gjennomhøyring opplevde eg eit deja vu. Eg kjende det slik at bandet tok meg 50 år attende i tid, til dei første møta mine med europeisk frijazz. Dette er så absolutt eit originalt uttrykk, men eit uttrykk så fullstendig reinsa for elektronikk, så fullstendig fokusert på stemmene og instrumenta at det gav meg ei kjensle av å gå attende i tida.

Komposisjonane består stort sett av korte melodiske fragment og stemningar som ofte endrar karakter. Pulsen i musikken kjem og går. Kvartetten har ei utprega assosiativ tilnærming til det å laga musikk. Det er fascinerande å vera med på ferda. Stor takk skal også lydteknikar Thor Bjørn Neby ha for å vera 100 prosent på bølgelengd heile tida.

Lars Mossefinn

Lars Mossefinn er frilans journalist og fast jazzmeldar i Dag og Tid.