Jazz

Anders Lønne Grønseth Multi­verse:

Inner View

Hayden Powell, trompet; Anders Lønne Grønseth, tenor- og sopransaksofon og bassklarinett; Espen Berg, piano; David Skinner, Hohner-pianet og clavinet; Audun Ellingsen, bass; Einar Scheving, trommer.
NXN Recordings

Musikken på Inner View er frå same innspelingsperiode som Outer View som kom i fjor. David Skinner har rett nok lagt på karakteristiske tangentklangar i etterkant, men dei to platene er i stor grad sydde over same lesten. Grønseth har skrive alt materialet, ein tredelt suite som opnar ballet med fem frittståande låtar.

Idealet til Grønseth er at av denne samlinga av fem musikalske «mikrounivers» skal det danna seg eit «multivers», ei kreativ samansmelting. På sitt beste kan ein med rette bruka dette bilete på den musikalske skapingsprosessen. Avslutningssporet «Bi litt!» er det beste dømet. Her får både Grønseth, Powell og Berg utfalda seg utan at dei kompositoriske rammene hemmar. Likevel er det samla inntrykket at Grønseth som komponist og arrangør set eit tydelegare preg på denne plata enn på dei tre førre Multiverse-utgjevingane.

Som lyttar lever eg godt med dette. Grønseth har eit tonespråk som hentar inspirasjon frå europeisk samtidsmusikk så vel som musikktradisjonar frå både Midtausten og India, men han formar det til sitt eige. Både den tredelte suiten «Blom» og låten «Bidevind» er strålande døme på at komponisten Grønseth har lukkast. Det er heller ikkje noko minus at ensemblesounden er heilt strøken.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.