Jazz

Anders Aarum trio:

Oslo Puzzle

Anders Aarum, piano; Jens Fossum, bass; Hermund Nygård, trommer
Ozella Music

Anders Aarum er eit velkjent namn for jazzinteresserte flest. Ikkje fordi han har hyllemeter med plater i eige namn, men fordi han er ein av dei mest brukte kompmusikarane her til lands. Folk veit kva dei får når dei leiger inn Aarum, ein musikar med store øyro og brei kunnskap, men også interessante ting å melda som solist.

For fire år sidan gav han ut Shakin’ Our Souls (Ozella) – ei plate meir dansevenleg enn opprivande. I 2019 brukte Aarum Fender Rhodes og synthen meir enn flygelet. På Oslo Puzzle er det motsett. Her har Aarum følgje med Fossum og Nygård. Desse tre har vore grunnstamma i sundagsjammen på Osloklubben Herr Nilsen i 15 år. Dei har garantert ikkje brukt mykje tid på å få samspelet til å sitja. I «Jason Paradisa & The Beautiful Fire», ein låt i rubato tempo, kjem dei inn eller glir ut av lydbiletet med perfekt timing.

Det er likevel ikkje eit typisk jamrepertoar dei serverer, men ti originalkomposisjonar førte i pennen av Aarum. Det er eit spenn i komposisjonane som gjer at ein får naudsynt variasjon i det klassiske trioformatet. Dei går frå ein New Orleans-inspirert groove i «Tune in, Drop out!» via den vakre Evans-påverka «Spaghetti Junction» til den seige bluesen «Ivory Tower».

Aarum er sjølvsagt hovudsolist og serverer mange pregnante bidrag, men han er særleg uutgrundeleg i «Drachmann’s Point of View». Også Fossum og Nygård får sagt sitt, spesielt i «Pata Paso» (anar ein eit vink til Miriam Makeba i temaet?). 15 års musikalsk samliv på Herr Nilsen gjev resultat.

Lars Mossefinn

Lars Mossefinn er frilans journalist og fast jazzmeldar i Dag og Tid.