Pop/jazz

Lyder Røed featuring Ojkos:

Freespace

Sofie Tollefsbøl, vokal; Lyder Øvreås Røed, Richard Köster og Tancred Heyerdahl Husø, trompet; Magnus Murphy Joelson, Johannes Fosse Solvang og Andreas Rotevatn, trombone og elektronikk; Henriette Eilertsen, fløyte; Camilla Hole og Tina Lægreid Olsen, saksofon og klarinett; Knut Kvifte Nesheim, vibrafon; Jørgen Kasbo og Arne Martin Nybo, gitar; Edvard Synnes, tangentinstrument; Alexander Hoholm, bass; Ola Øverby, trommer. Jazzland Recordings

Det er vel som venta av eit orkester der medlemene skal vera både instrumentalistar og komponistar, at repertoaret blir mangfaldig. Eg har tidlegare meldt platene til Ojkos med musikk signert Andreas Rotevatn og Knut Kvifte Nesheim. Musikken til Lyder Røed er definitivt ein annan skål. Røed deler frilanskarrieren mellom ulike band som Fieh, Lyder Røed kvintett, Bangkok Lingo, Slow is the new fast og Ojkos.

Dette er først og fremst popmusikk i slekt med det Fieh framfører, men med blåsearrangement. Arrangementa har ein del fine passasjar. Røed skriv fint for trompet. Ikkje spesielt overraskande, det. Det mest interessante er likevel den klangpaletten han utviklar med dei elektroniske instrumenta, vibrafonen og blåsarane. «Remember» er slik sett eit lovande opningsspor.

Når ein likevel raskt misser interessa, er det fordi det er lite eller inkje i tekst og melodi som engasjerer. Tekstane er heilt utan poetisk kraft. Tollefsbøl har heller ikkje ei røyst som tilfører tekstane eit utvida tolkingsrom. Arrangementa er høviske og understøttande, men ikkje noko meir. Røed har eit par fine kor på opningssporet og «Get Back to Me», men det blir berre ei påminning om kva dette kunne ha blitt.

Lars Mossefinn

Lars Mossefinn er frilans journalist og fast jazzmeldar i Dag og Tid.