Hiphop

Kanye West og Ty Dolla Sign:

Vultures 1

YZY

Hiphopstjernene Kanye West og Ty Dolla Sign har gitt ut sitt første duoalbum, Vultures 1. Eg har høyrt ein heil del på ein versjon som lak ut på nettet for ei tid sidan, og hadde ein idé om at denne meldinga skulle bli relativt uproblematisk å skrive, men så tumla eg ned i det mørke kaninholet Kanye West har grave for og kring seg sjølv.

Det første som slo meg då eg sette på den endelege utgjevinga, var at det som skulle vere opningssporet, «Everybody», manglar. Backstreet Boys gjekk tilsynelatande ikkje med på å låne musikken sin til prosjektet. Det ville kanskje ikkje vi heller, slik som artisten-som-trur-han-er-gud (bokstaveleg tala) driv og talar politikk og bruker kjendis- og milliardærstatusen sin til å spreie betente raseteoriar for deretter å surmule i det lange og breie om kor smertefullt det er å få kritikk for å ha ytra antisemittismar.

Elles er det mykje bruk av samplingar og tolkingar av kjent låtmateriale her, til dømes Donna Summer og The Police. Rapparen Freddie Gibbs’ bidrag til «Back To Me» – med Run DMC-samplingar – er høgdepunktet her. God låt.

Rett skal vere rett: Ty Dolla Sign og West har gjort mange dristige produksjonsval på Vultures 1, men ein kan bli ganske sliten av Wests enorme sjølvopphøging og sjølvopptekne sutring. Vi får håpe han snart innser at det er best om han held seg til å lage musikk og sluttar klage høgt om små honorar på fem hundre millionar dollar, spreie paranoide konspirasjonsteoriar, stille til presidentval og så vidare.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.