Pop / hiphop /TV

Eurovision Song Contest 2022:

Grand Finale (Kalush Orchestra – «Stefania»)

Eurovision

Eurovision-finalen førre laurdag blei ein skikkelig thriller, men enda godt. Resultatet synte at publikum har betre vurderingsevne enn profesjonelle synsarar, og når ukrainske Kalush Orchestra spelte sin sigersdakapo, hadde Eurovision blåst nytt liv i trua mi på demokratiet.

Kalush er ein blytung ukrainsk raptrio, og i sideprosjektet Kalush Orchestra blandar trioen hiphop med ukrainsk folkemusikk. Eurovision-bidraget deira, «Stefania», inneheld tradisjonsrike korklangar og tradisjonelle fløyter kalla sopilka og telenka, og bandet opptredde i folkedrakter frå forskjellige delar av Ukraina. Teksten blei skriven som ei hyllest til rapparen Oleg Psyuks mor, men har fått nye lag av meining etter Putins Russlands overgrep mot Ukrainas folk: «Hovudmeldinga handlar om morskjærleiken som oppfriskar universet og gir liv», har Psyuk sagt.

Etter innslaget som sikra sigeren, bad rapparen ei innstendig bønn om å hjelpe Ukraina og dei som er fanga ved Azovstal-stålverket i Mariupol «right now». Det er ikkje tillate å kome med «politiske utsegner» frå Eurovision-scena, og kommentaren frå ansvarleg arrangør EBU var nesten sjokkerande klok: Dei sa at støtteerklæringane til det ukrainske folket frå Kalush Orchestra og andre artistar er av humanitær snarare enn politisk karakter.

Det var skuffande å sjå brorparten av Europas riksmusikksynsarar gi Storbritannias glattproduserte, klisjéprega og forgløymelege popsviske maks poeng og få eller ingen til Ukraina. Heldigvis visste folket betre: Dei gav ukrainske Kalush Orchestra 439 poeng og det moldovske folkepunkbandet Zdob si Zdub 239 (mot 192 og 14 frå juryane). Det var dei to beste innslaga. Massane har same musikksmak som underteikna. Tenk det, du.

Rasmus Hungnes

Rasmus Hungnes er kunstnar, musikar, DJ og fast musikk­meldar i Dag og Tid.