Jazz

Sinikka Langeland:

Wind And Sun

Sinikka Langeland, vokal, kantele og munnharpe; Mathias Eick, trompet; Trygve Seim, tenor- og sopransaksofon; Mats Eilertsen, bass; Thomas Strønen, trommer. ECM

Dikta er spirituelle og opne utan å vera klisjéaktige. Slik grunngav Sinikka Langeland på Kveldsnytt 14. august kvifor ho har valt å arbeida med dikt av Jon Fosse. På den nye plata har ho funne fram til 14 Fosse-dikt. Dikta er henta frå ulike samlingar frå Hundens bevegelsar (1990) til Stein til stein. 39 dikt og 1 salme (2013). Ho har sett tone til og gjeve tekstane eit musikalsk bakteppe som tek vare på det særmerkte i poesien til Fosse.

Langeland har arbeidd med musikk og poesi i fleire tiår. I 1995 gav ho ut plata Har du lyttet til elvene om natta? med Hans Børli-dikt. På The Land That Is Not (2011) er det Edith Södergren og Olav H. Hauge som bidreg med tekstane, og på The Half-finished Heaven (2015) er turen komen til Tomas Tranströmer.

Musikken hennar er djupt forankra i den skogfinske tradisjonen, men ho har jobba med jazzmusikarar i mest heile karrieren sin, så Langeland lèt seg ikkje setja i bås. Ho har laga eit bossa nova-aktig tonefølgje til dikta «Den kjærleik» og «Kvarandre» og leikar seg rytmisk i den blå «minisuiten» «You Hear My Heart Come», og så har ho lånt låten «Velkomen med æra» av Geirr Tveitt til «Eit barn som finst». Hadde ein ikkje visst anna, kunne ein trudd at Tveitt hadde skrive denne melodien til nett dette diktet. Heldigvis har plateselskapet teke med to versjonar av denne låten.

Med Eick, Seim, Eilertsen og Strønen i bandet kan eigentleg ingenting gå gale. Dei gjev farge, fundament og identitet til uttrykket som gjer dei til meir enn medmusikantar. Dei er medskaparar til eit uttrykk som set Fosse-dikta inn i eit nytt perspektiv.

Lars Mossefinn

Lars Mossefinn er frilans journalist og fast jazzmeldar i Dag og Tid.