Folkemusikk

Eriksson/Myhr/Malmström:

För sola skin’ på tak

Heilo

Mykje av den nyare samspelsbaserte folkemusikken er påverka av impulsar frå Sverige. Og på denne plata er det ein svensk gitarist – Thomas Eriksson – som har komponert ny folkemusikk som han sjølv framfører i samspel med den norske hardingfelespelaren Helga Myhr og den svenske klarinettisten Anna Malmström.

Gitaren får ofte rolla som «komp» i folkemusikkonstellasjonar. Dette har Eriksson vilja snu på ved å skapa «en instrumentering der vanlige melodiinstrumenter også kunne tilføre et spennende akkompagnement når gitaren fører melodien».

Og det er nettopp det at alle tre instrumenta vekslar mellom rollene som melodiinstrument og akkompagnement (eller noko midt mellom), som gjer dette spanande å lyda på. For elles er musikken sett saman av element ein har høyrt før, som slåtteliknande motiv og dur- eller mollakkordar i velkjende kombinasjonar.

Musikken er ofte melankolsk, men det er likevel noko luftig og lyst over det heile. Dette kjem dels av at musikken aldri er overarrangert eller påtrengande, og at alle instrumenta kling mjukt og vennleg. Skarpe kantar er heilt fråverande. Særleg når Malmström nyttar bassklarinetten, får lydbiletet tilført ein varme som lyfter prosjektet. Og det er i dei rolege melodiane musikken kjem best til sin rett, som i det viseaktige sporet «Å lykton», som avsluttar den drygt halvtimelange plata.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.