Rock

Big Thief:

Dragon New Warm Mountain I Believe In You

4AD / Playground

Då Adrianne Lenker – låtskrivar, vokalist og gitarist i Big Thief – først spelte «Spud Infinity» for bandtrommis James Krivchenia, som har produsert det ferske albumet til gruppa, hadde ho ikkje noka tru på songen. Enderima verka trivielle, og går det eigentleg an å ha med eit ord som «kvitløksbrød» i ein song? 

Krivchenia såg annleis på det. Låten fekk han rett og slett til å felle nokre tårer. Dermed vart det til at «Spud Infinity» likevel fekk plass på dobbeltalbumet Dragon New Warm Mountain I Believe In You, saman med 19 andre nye komposisjonar.

Breidde

Anekdoten, som dukkar opp i ei sak om Big Thief i musikkbladet Rolling Stone, fortel eitt og anna om korleis bandet har tenkt i arbeidet med plata som er ute i dag, 11. februar. Lenker, Krivchenia, Max Oleartchik (bass) og Buck Meek (gitar) ønskte at utgivinga skulle reflektere den musikalske breidda deira og nye impulsar som gjer seg gjeldande i ei omskifteleg tid.

«Spud Infinity» er spelt inn i Tucson i Arizona, der dei fekk med Mat Davidson (Twain) på fele og vokal, og viser Big Thief frå ei lett og rootsy side. Men Dragon New Warm Mountain I Believe In You er laga tre stader til, med ulike folk med på produksjonssida, i økter nord i delstaten New York, i Topanga Canyon i California og i Rocky Mountains i Colorado. Opptaka frå desse stundene teiknar eit bilete av eit band som både orienterer seg i ulike retningar og er ope for kontinuerleg endring.

Frå eit materiale på 45 songar valde dei ut 20, på ei utgiving som dermed framstår som ein redigert dokumentasjon over ein bestemt epoke for bandet (som platedebuterte i 2016), der dei utforskar kva dei er, og kva dei kan vere. På den måten minner plata meg litt om det omfangsrike albumet R.E.M. i si tid laga på turné, New Adventures in Hi-Fi (1996).

Spontanitet

Fleire stader kan ein merke ein spontanitet og ein impulsivitet som medverkar til å gi opptaka ein eigen energi, og også ein slags dokumentarisk kvalitet, som om vi er i rommet akkurat idet noko skjer. Når du lyttar til «Time Escaping», til dømes, bryt Lenker ut: «Det er musikk, Oso!» Snarare enn ei kuriøs tekstline er dette meint å roe ned kvalpen hennar, som brått kom inn i vokalbåsen då ho stod og song, og som nok lurte på kva som gjekk føre seg.

Kanskje kan ein seie at denne plata difor også har noko raust over seg, for her er det noko for alle, uansett kva for utgåve av Big Thief ein måtte føretrekke – og eg vil tru fleire trufaste lyttarar nett er glad i det breie registeret.

Eit anna aspekt ved dette albumet er at det også dermed rommar ei forteljing om eit band gjennom ei prøvande tid. Pandemien lurer i skuggane fleire stader på Dragon New Warm Mountain I Believe In You, og mykje her er då også spelt inn i dei verste lockdown-tidene i 2020. 

Då Big Thief kom saman for å lage dei første opptaka, i eit studio i Catskills-fjella, var det ei stund sidan sist dei hadde kunna vere i lag, og alt kjendest stivt og rart. Så tok gjengen eit bad i ei iskald elv bak huset dei laga musikk i, og sprang tilbake og heldt fram med å spele inn i det våte badetøyet.

På sitt vis fortel songane på dette albumet om prosessen dei gjekk gjennom for å komme saman igjen, for å finne glede og meining i det kollektivet kvar og ein av dei er ein del av.  

Øyvind Vågnes

Øyvind Vågnes er forfattar og fast musikkskribent i Dag og Tid.