Samtidsmusikk

Martin Taxt:

Second Room

Martin Taxt, mikrotonal tuba og bjøller; Rolf Erik Nystrøm, altsaks og bjøller; Laura Marie Rueslåtten, orgel og bjøller; Inga Margrete Aas, bass og bjøller; Peder Simonsen, mikrotonal tuba, modulær synth og bjøller. Sofa

Martin Taxt har eit mangslunge musikalsk virke. Han er studiomusikar med kjende populærmusikalske artistar som Odd Nordstoga, Hanne Hukkelberg og Maria Mena, og han er med i Music for a While, men det meste av energi og skaparkraft har han lagt i arbeidet som komponist og utøvande musikar i eksperimentelle konstellasjonar, mellom anna den norsk-japanske kvintetten Koboku Senjû. Han er i tillegg med på å driva festivalen Fri Resonans og plateselskapet Sofa.

Taxt vender seg også til Japan for å finna inspirasjon i meir indirekte form. Han har late seg inspirera av arkitekten Sou Fujimoto og teoriane hans om arkitektur og menneskeleg framferd, der han set opp reiret og hola som motsetnader. Taxt har laga eit rutemønster med 36 ulike tonehøgder og labyrintar gjennom dette rutemønsteret i dei tre komposisjonane «Cave vs Nest», «Swelling Forms of Domes» og «Paving Seen from Above».

I «Disruption, Disjuction, Deconstruction» finn den einskilde musikaren sin veg, sin «labyrint». Fujimoto er nok sikkert meir inspirerande for komponisten enn som lytterettleiing, men å lesa om arkitekten og sjå dei mange særmerkte bygga han har skapt til akkompagnement av musikken til Taxt, har vore gjevande.

Ein må gje seg god tid i møte med musikken på Second Room. Komposisjonane er sette saman av klangflater som avløyser kvarandre, eller som mest umerkande endrar karakter. I denne samanhengen blir bruken av bjøller eller gongar som ei tilkopling til tida. Du vil merka at du har lytta til Second Room.

Lars Mossefinn

Lars Mossefinn er frilans journalist og fast jazzmeldar i Dag og Tid.