Pop / elektronisk musikk

Perel:

Jesus Was an Alien

Kompakt

Annegret Fiedler, eller Perel, har så lenge ho kan hugse, komponert elektroniske lydspor, inspirert av synthpop og new wave, til dagdraumane sine. Synthwave- og nu disco-musikken på det nye albumet Jesus Was an Alien bringar rett som det er tankane til den nyleg avlidne greske synthesizerguruen Vangelis’ Blade Runner-musikk og lågbudsjettsjangerfilmens meister, John Carpenter (The Thing, Escape From New York).

Begge desse synthlegendene har ein episk og storslegen stil, og ein liknande ublyg lyd av frilynt og ekstravagant fantasi pregar Perels musikk. Tru står på agendaen, med songtitlar som «Religion», «The Principle of Vibration» (som minner om sein 80-tals-electro boogie à la Salt-n-Pepa og Rick James’ discofunkklassikar «Super Freak») og «Matrix», som tyder både opphav og kjelde, livmor og mamma.

Å lytte til Perels musikk er å late øyra bli fylte med saliggjord, nærande mjølk. I tillegg til å stå for den framifrå instrumentalproduksjonen syng Perel med leiken stemmebruk både på engelsk og på morsmålet tysk, til dømes på darkwave-eposet «Kill the System». Instrumentalen «Life Aquatic», kalla opp etter filmen med same tittel, lettar stemninga nokre hakk med fargerik, omsluttande og boblande snorkelstemning, før «Am Kanal» tar oss med på ei sildrande, fredsæl og nostalgisk vandring langs ein tysk kanal.

Med på tittelsporet er den kanadiske elektropopdivaen Marie Davidson, kjend for sitt storslegne soloarbeid og darkwave-bandet Essaie Pas. Teksten, som vert framført på engelsk og fransk om ein annan, kan minne om dokumentarserien Ancient Aliens’ stadige retoriske refreng: «Kan det tenkjast...? Og i så fall...?!» Vel, uansett om det kan eller ikkje kan tenkjast at Jesus var eit romvesen, er dette eit framifrå album.

Rasmus Hungnes

Rasmus Hungnes er trommis, dj, kritikar, kunstnar og musikkmeldar i Dag og Tid.