Konsert

Bobo Stenson Trio

Bystyresalen, fredag

Å sitja på fremste benk i den arkitektonisk vakre og akustisk gode bystyresalen og lytta til favorittpianotrioen sin er toppen av lukke – spesielt når denne trioen har ein heilt optimal dag på jobben. Bobo Stenson (piano), Anders Jormin (bass) og Jon Fält (trommer og kalimba) har jobba saman i 18 år. Kjemien må vera der om eit samarbeid skal fungera og vera kunstnarleg gjevande etter så lang tid, men ein merkar med ein gong at desse tre elskar å skapa musikk saman.

Dei byrja med Sven-Erik Bäcks «Våren» og følgde opp med ein song frå Nord-Korea, som naturleg førte vidare til Alfred Jansons «Ky og vakre Madame Ky», ei nidvise om den sørvietnamesiske leiaren og playboyen Nguyen Cao Ky. Trioen brukar humor for å få fram ironien, og Stenson spelar eit av sine pregnante kor – mest som ein komposisjon i komposisjonen. Dette leier oss fram til det førebelse høgdepunktet i konserten «Don’s Kora Song» (som er å finna på Cantando, ECM, 2008). Temaet blei spelt av Stenson og Fält (på kalimba). I den improviserte sekvensen skifta Fält ut kalimbaen med trommene.

Siste del av konserten byrja med to Jormin-komposisjonar der han fekk vist at han er ein virtuos med bogen. Bluesklassikaren som er ført i pennen av saksofonisten Gary Bartz, blei eit springbrett for trioen til å kasta seg ut i ein lengre bolk som på engelsk heiter trading fours, musikalsk samtalekunst av beste sort!

Det er ikkje ofte det skjer, men ekstranummeret blei faktisk det ultimate høgdepunktet. Ein latininspirert låt trigga både Stenson og Jormin til solistiske høgder, og låten varte mykje lenger enn ekstranummer brukar å vara.