Jazz

Jan Gunnar Hoff:

Home

Jan Gunnar Hoff, piano. 2L

Jan Gunnar Hoff har ein internasjonal karriere, men han har alltid vore ein heilt sentral del av nordnorsk jazzliv. Symptomatisk for denne forankringa er det at han i 2010 tok initiativet til jazzfestivalen Bodø Open og var festivalsjef i perioden 2011–2020. Denne forankringa kjem også til syne på denne soloinnspelinga.

Lydguruen Morten Lindberg spurde i mai i fjor om Hoff kunne tenkja seg å spela inn ei soloplate i kulturhuset Stormen. Hoff brukte sommaren på å bu seg mentalt og velja repertoar.

I ein svært informativ tekst i omslagsheftet strekar han under at dette ikkje er ein freistnad på å laga eit album i ein spesifikk sjanger, men heller la kvar enkelt komposisjon leva sitt eige liv, og repertoaret er i sanning variert. Den raske, småfunky «Summertime» med ein «coreask» intro står i kontrast til den lågmælte og dvelande «Moon River».

På plata finn ein i tillegg «Barndomsminne fra Nordland» («Å, eg veit meg eit land»), «Bruremasj fra Beiarn» og Terje Nilsens «Kanskje» – alle fine tolkingar, men det er Hoffs eigne komposisjonar som gjer at plata er mat for ettertanken.

Hoff er ein melodikar av rang, og han har ein sikker formsans. Eg har late meg forføra av den lyriske «Meditatus», begeistra av den elegante forma til «Free Flow», late melankolien fritt strøyma på i selskap med «Detour» og falla i stavar over den meditative «Magma». Hoff er på sitt beste når han tolkar Jan Gunnar Hoff.

Lars Mossefinn

Lars Mossefinn er frilans journalist og fast jazzmeldar i Dag og Tid.