Rock

Hella:

Hold Your Horse Is (Deluxe Reissue)

Kill Rock Stars

Math rock er kjenneteikna av komplekse rytmiske samanstillingar, oddetakter, utvida akkordar, plutselege stopp og usedvanlege taktskifte og tonale vendingar. Den amerikanske duoen Hella er ein – eller to, rettare sagt – av dei mest kjente aktørane innan stilarten, med gitaristen Spencer Seim, som elles spelar rocka Nintendo-musikk som trommeslagar i «nintendocorebandet» The Advantage, og trommeslagaren Zach Hill, som òg speler og har spelt med det eksperimentelle hiphopbandet Death Grips og norske Stian Westerhus, mellom andre.

Hellas debutalbum Hold Your Horse Is kom først ut i 2002. Sidan har det blitt sementert som ein matterockklassikar og er no tilgjengeleg i remastra utgåve (med to forvitnelege demoinnspelingar attpå). Den tett samspelte duoen får komplekse polymeter, oddetakter og uventa modulasjonar til å låte som den mest naturlege ting i verda – og det er kan hende det: Den einaste konstanten i verda er endring, som det vert sagt.

Musikken til Hella er heller hardtslåande og svært energisk, og medan Hold Your Horse Is kan hende ikkje passar så godt som taffelmusikk til julemiddagen, er det tale om usedvanleg fengjande ekstremmusikk – det er berre å låne lydbølgjene eit øyre (helst to). Til og med dei mest dissonante og bikubeaktige gitarriffa og kompromisslause, hardtslåande trommemønstra har ein kvalitet som roper eit (hei)dundrande hurra for livet og eksistensen; den mjukt pipande klangen av Nintendo Gameboy-spelkonsollen det heile startar med, set den tonale termostaten til ein behageleg temperatur som blir understreka av dei subtile endringane i remasteren. Så er det berre å bli med Hella på ridetur i full galopp.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.