Jazz / Verdsmusikk

Kristin Asbjørnsen:

Hjemveier

Kristin Asbjørnsen, vokal og piano; Olav Torget, ymse gitarar og bass; Eivind Aarset, gitar, bass og elektronikk; Anders Engen, perkusjon, piano, synth, dobro og vokal; Suntou Susso, kora og vokal; Monica Ifejilika, vokal. Kirkelig Kulturverksted

Alle reiser er ein omveg heim, den kjende boktittelen av Herbjørn Sørebø frå 1974, kan stå som ein undertittel på Kristin Asbjørnsens nye plate, den første utgjevinga med norske tekstar frå hennar side.

Heilt sidan den kritikarroste Wayfaring Stranger – A Spiritual Songbook (2006) har Asbjørnsen utvikla eit musikalsk uttrykk med røter i gospeltradisjonen, men også påverka av vestafrikansk mandinka. Ho har oftast hatt med seg folk som trakterer eit rikt utval strengeinstrument. Olav Torget har vore ein trufast musikalsk følgjesvein.

Med Hjemveier har Asbjørnsen teke (eit førebels?) farvel med gospeltradisjonen og erstatta det med eit moderne vise/pop-uttrykk ispedd jazz og musikk frå Vest-Afrika.

Det pulserande, strengebaserte er framleis ein berebjelke i det musikalske reisverket, men plata opnar og sluttar med røysta til Asbjørnsen til eige pianoakkompagnement. Vokaluttrykket og arrangementa gjev tekstane god plass, og slik sett blir tekstane som berande element forsterka.

Dei konkrete, sentrallyriske tekstane toler presset. Den stramme musikalske regien opnar ikkje for noko improvisatorisk frislepp, men bandet serverer mange utsøkte detaljar i dei skreddarsydde arrangementa. Kristin Asbjørnsen på norsk er svært vellukka.

Lars Mossefinn

Lars Mossefinn er frilans journalist og fast jazzmeldar i Dag og Tid.