Jazz

Moskus:

Papirfuglen

Anja Lauvdal, synthar, cembalo, vocoder, piano og sampling; Fredrik Luhr Dietrichson, cello, mandolin og kontrabass; Hans Hulbækmo, trommer, perkusjon, munnharpe, trommemaskin, klokkespel og opptakar. Hubro

Å kalla Moskus ein pianotrio er sterkt misvisande. Moskus anno 2022 lèt seg ikkje setja i bås – sjølv i den romslege båsen pianotrio. Heilt sidan debuten Salmesykkel i 2012 har trioen vore på jakt etter nye uttrykk. Det har sikkert vore nyttig at medlemene i trioen har mange andre musikalske jern i elden. Dei tek kunstnarlege sjumilssteg ved kvar ny plateutgjeving.

Alle bidreg til utforskinga og komponeringa. Musikken er spelt inn live i Ugla studio på Nesodden med Morten Quenild bak spakane 9. og 10. desember i 2020. Gjennom innspelinga viskar dei ut skilje mellom det komponerte og det improviserte. Dei leikar hemingslaust med klangpaletten og dyrkar dei sterke kontrastane og ei minimalistisk tilnærming til det musikalske forløpet. Alt dette manifesterer seg i den fabelaktige «Hildegard». Tittellåten er nok eit døme på kor vellukka den leikande tilnærminga til skapingsprosessen er.

Den viktigaste kvaliteten ved plata er likevel korleis dei skapar ein heilskap av åtte kompositoriske skisser, til dømes «Hjorten i skogen». Det som ved første gjennomhøyring kan gje ei kjensle av noko fragmentarisk, føyer seg saman til ei heilt spesiell lytteoppleving. Papirfuglen er ei krevjande musikalsk oppdagingsreise som eg med glede tek om att og om att.

Lars Mossefinn

Lars Mossefinn er frilans journalist og fast jazzmeldar i Dag og Tid.