Viser/pop

Ine Hoem:

Alt vi har kjært

Ine Hoem, vokal; Markus Lillehaug Johnsen, gitar; Andreas Ulvo, tangentinstrument; Jo Berger Myhre, bass; Pål Hausken, trommer; Mathias Eick, trompet (4); Thorbjørn Harr, vokal (7)
Slaraffensongs

Det var med blanda forventningar eg sette på denne CD-en. Kor godt ville det litterære universet til Edvard Hoem gå i hop med det musikalske universet til Ine Hoem? Det enkle svaret er – heilt ok.

Alle dei ni songane har tekst av Edvard Hoem, men Ine Hoem har fått hjelp av Henning Sommerro og Håkon Berge med komponeringa. Sommerro har signert tre låtar, og Berge har sett tone til det absolutte høgdepunktet på plata «No stig vår song». Berge har på magisk vis konstruert ein melodi og ei harmonisering som gjev ei perpetuum mobile-kjensle.

Arrangementa er oftast sparsame, og det fine bandet ho har med seg, legg kledeleg band på seg. Lydbiletet set vokalen i framgrunnen, og tekstane vert formidla krystallklart på ein liketil måte. Sommerros «Sorgsalme» og Hoems eigen «Alt vi har kjært» illustrerer dette på framifrå vis. (Likevel hadde det vore ynskjeleg at tekstane stod på omslaget.)

Minst vellukka er «Så syng eg da ein song for deg». Teksten kjem ikkje til sin rett i denne raske og føreseielege poplåten, men dette er det eine unnataket. Elles opnar produksjonen ikkje opp for improviserte sekvensar. Unnataket er «Den fattige Gud» der Mathias Eick på karakteristisk vis serverer eit kort og formfullenda trompetkor. Ei plate for mørke vinterkveldar.

Lars Mossefinn

Lars Mossefinn er frilans journalist og fast jazzmeldar i Dag og Tid.