Samtidsmusikk

Kjetil Husebø:

Emerging Narratives

Kjetil Husebø, synth, sampling, FX, elektronikk, programmering, lyddesign og redigering; Arve Henriksen, trompet, valthorn, tenorhorn, klarinett, fløyte og sampling; Eivind Aarset, gitar, sampling og FX.
Optical Substance Productions

Komponisten og pianisten Kjetil Husebø frå Bergen, no busett i Oslo, har i ein knapp mannsalder jobba med prosjekt som sjangermessig er å finna innanfor ambient-inspirert samtidsmusikk i jazzens grenseland. Musikken til Husebø er ofte storslått og filmatisk. Platesamarbeidet med Arve Henriksen byrja med utgjevinga Sequential Stream (2022). Eivind Aarset kom med på lasset året etter, på plata Years of Ambiguity. Først med Emerging Narratives slår samarbeidet ut i full blom.

Dei tre har arbeidd med stoffet og innspelinga frå ulike studio i perioden frå april 2022 til november 2023. («Nohtronia» blei spelt inn i mai 2021.) Med ein slik arbeidsmåte blir komponering og innspeling ein pågåande prosess, der det endelege resultatet kan ha endra seg monaleg frå utgangspunktet. Musikken er såleis kreditert Husebø og Henriksen (3), Husebø og Aarset (2) eller alle tre (3).

Dei åtte låtane er ein suite som blir bunden saman av gjentakande kompositoriske grep, der trompeten framfører temaet på ei seng av elektroniske klangar. I nokre tilfelle tek gitaren trompeten sin plass. Musikken bevegar seg aldri i raske tempo, sjølv om han ikkje er utan puls og groove. Det meditative gjennomsyrer musikken.

Med låten «Ripples of Connections» bryt dei fortryllinga. Dette er ein låt som kunne ha passa perfekt til ein amerikansk krimserie frå seint 1960-tal. Trass i dette vesle feilskjeret kan ein likevel slå fast at Husebø, Henriksen og Aarset har laga ei av dei beste filmmusikkplatene det ikkje er laga film til.

Lars Mossefinn

Lars Mossefinn er frilans journalist og fast jazzmeldar i Dag og Tid.