Jazz

John Coltrane:

Evenings at The Village Gate

John Coltrane, sopran- og tenorsaksofon; Eric Dolphy, bassklarinett og fløyte; McCoy Tyner, piano, Reggie Workman og Art Davis (5), bass og Elvin Jones, trommer.
Impulse

Det tynnest ut med uoppdaga innspelingar av dei store meistrane, men framleis lever draumen om at den heilage gralen skal finnast på eit eller anna roteloft. Ymse arvingar og plateselskap har økonomiske interesser i å halda liv i mytologien. I dag kjem siste skotet på stuven, Evenings at The Village Gate. Opptaka er frå august 1961 og blei gjorde av lydteknikaren på staden, Rich Alderson. Å påstå at han hadde ei heldig hand med oppgåva, vil vera å ta litt hardt i.

Dolphy var fast medlem av bandet til Coltrane dette året, og musikken skapte reaksjonar. Down Beat-kritikaren John Tynan skildra musikken som «musical nonsense being peddled in the name of jazz» med referanse til engasjementet som bandet hadde på Village Vanguard i byrjinga av november, og som ein kan lytta til i heilskap på The Complete 1961 Village Vanguard.

Dei fem låtane på den nye utgjevinga er kjent stoff, «My Favorite Things», «When Lights Are Low», «Impressions», «Greensleeves» og «Africa», men det er eit stykke mellom drammane.

Soprankoret til Coltrane og Dolphys «rundvask» av «When Lights Are Low» er minneverdige nok. Duetten mellom Workman og Davies på «Africa» illustrerer godt kvifor Coltrane brukte to bassar i innspelingar og konsertar på denne tida, men lyden på innspelinga er så dårleg at dette i første rekkje vil engasjera studentar, forskarar og blodfans av Coltrane.

Lars Mossefinn

Lars Mossefinn er frilans journalist og fast jazzmeldar i Dag og Tid.