Familieskattar
Reinhard Goebel lyfter fram ukjend musikk frå Bach-slekta.
Albumet inneheld ein musikalsk slagscene (battaglia) av bestefar til J.S. Bachs andre kone. Her slaget ved Beograd i 1717, måla av J.G. Auerbach (1697–1753).
Standardinnspelinga
H. Bach, J.L. Bach, J.C. Bach, C. Wilche, «Sign. Pagh», J.S. Bach:
Bachiana
Musica Antiqua Köln; leiing og fiolin: Reinhard Goebel. Archiv 2000
Til 250-årsmarkeringa for Johann Sebastian Bach (1685–1750) i 2000 gav den tyske fiolinisten og dirigenten Reinhard Goebel ut Bachiana. Music by the Bach Family. Her tok han føre seg instrumentalmusikk av eldre komponistar i Bach-slekta og avslutta det heile med ein rekonstruksjon av J.S. Bachs forspel til «Påskeoratoriet», BWV 249, der den tredje og siste satsen er ei vellukka omarbeiding av ein korsats til rein orkestermusikk.
Klangtale
Goebels orkester, Musica Antiqua Köln, som eksisterte frå 1973 til 2006, har på fleire vis prega måten barokkmusikken i vår tid blir spelt på. Ein ting er dei høge tempoa Goebel ofte insisterte på, som tilførte tidlegmusikken ein ny type virtuositet. Noko anna og viktigare er at ensemblet var ein skule for mange no framståande musikarar og dirigentar som i sine yngre år blei drilla – og då meiner eg verkeleg drilla – i Goebels strenge orkesterdisiplin.
Goebel har i dag lagt fiolinen på hylla og er professor i historisk framføringspraksis ved musikkhøgskulen Mozarteum i Salzburg. Meir enn nokon annan forma han den barokke strykarklangen slik ein kultiverer han i dag, med slank og overtonerik klang heilt utan vibrato, og tysk sans for distinkt, gjennomtenkt artikulasjon i fraseringane. Nærleiken til språket, det retoriske ved musikken (på tysk samanfatta med 1700-talsomgrepet Klangrede, «klangtale») er noko Goebel støtt nemner i intervju og artiklar.
Musikalsk slagscene
Repertoaret på plata spenner frå seinrenessanse til høgbarokk. Ho opnar passande nok med ein ouverture i fransk stil av Johann Ludwig Bach (1677–1711), Johann Sebastians firmenning. Ouverturen og dei fylgjande dansesatsane er sobert komponerte. Særleg frydefull er den kvikke rytmikken i finalesatsen Bourrée.
Seinrenessansens tette klang og røffe akkordvekslingar pregar dei to femstemmige sonatane av Heinrich Bach (1615–1692), ein av stamfedrane i slekta. Den fyrste sonaten i C-dur er litt keisam. Han har for mange repetisjonar. Meir liv er det i den andre sonaten i F-dur, som har parti med fine ekkoeffektar. Det einaste soloverket er av Heinrichs son, Johann Christoph Bach (1642–1703), nemleg eit tema med variasjonar for cembalo som varer i 16 minutt og i form liknar på Johann Sebastians «Goldbergvariasjonar».
Cyriacus Wilche (ca. 1620–1667) er med på plata sidan han truleg var bestefar til Johann Sebastians andre kone, Anna Magdalena Bach. Hans Battaglia er morosam. Dette er ein musikalsk slagscene av typen som var populær på 1600-talet, med marsjar, imitasjon av kanonsmell, sørgjesongar og sigersfanfarar. Utan samanlikning best er likevel dei tre sluttspora med Johann Sebastians alt nemnde forspel til «Påskeoratoriet», der musikken løfter seg til eit heilt anna nivå.
Sjur Haga Bringeland
Sjur Haga Bringeland er musikar, musikkvitar og fast musikkmeldar i Dag og Tid.
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Standardinnspelinga
H. Bach, J.L. Bach, J.C. Bach, C. Wilche, «Sign. Pagh», J.S. Bach:
Bachiana
Musica Antiqua Köln; leiing og fiolin: Reinhard Goebel. Archiv 2000
Til 250-årsmarkeringa for Johann Sebastian Bach (1685–1750) i 2000 gav den tyske fiolinisten og dirigenten Reinhard Goebel ut Bachiana. Music by the Bach Family. Her tok han føre seg instrumentalmusikk av eldre komponistar i Bach-slekta og avslutta det heile med ein rekonstruksjon av J.S. Bachs forspel til «Påskeoratoriet», BWV 249, der den tredje og siste satsen er ei vellukka omarbeiding av ein korsats til rein orkestermusikk.
Klangtale
Goebels orkester, Musica Antiqua Köln, som eksisterte frå 1973 til 2006, har på fleire vis prega måten barokkmusikken i vår tid blir spelt på. Ein ting er dei høge tempoa Goebel ofte insisterte på, som tilførte tidlegmusikken ein ny type virtuositet. Noko anna og viktigare er at ensemblet var ein skule for mange no framståande musikarar og dirigentar som i sine yngre år blei drilla – og då meiner eg verkeleg drilla – i Goebels strenge orkesterdisiplin.
Goebel har i dag lagt fiolinen på hylla og er professor i historisk framføringspraksis ved musikkhøgskulen Mozarteum i Salzburg. Meir enn nokon annan forma han den barokke strykarklangen slik ein kultiverer han i dag, med slank og overtonerik klang heilt utan vibrato, og tysk sans for distinkt, gjennomtenkt artikulasjon i fraseringane. Nærleiken til språket, det retoriske ved musikken (på tysk samanfatta med 1700-talsomgrepet Klangrede, «klangtale») er noko Goebel støtt nemner i intervju og artiklar.
Musikalsk slagscene
Repertoaret på plata spenner frå seinrenessanse til høgbarokk. Ho opnar passande nok med ein ouverture i fransk stil av Johann Ludwig Bach (1677–1711), Johann Sebastians firmenning. Ouverturen og dei fylgjande dansesatsane er sobert komponerte. Særleg frydefull er den kvikke rytmikken i finalesatsen Bourrée.
Seinrenessansens tette klang og røffe akkordvekslingar pregar dei to femstemmige sonatane av Heinrich Bach (1615–1692), ein av stamfedrane i slekta. Den fyrste sonaten i C-dur er litt keisam. Han har for mange repetisjonar. Meir liv er det i den andre sonaten i F-dur, som har parti med fine ekkoeffektar. Det einaste soloverket er av Heinrichs son, Johann Christoph Bach (1642–1703), nemleg eit tema med variasjonar for cembalo som varer i 16 minutt og i form liknar på Johann Sebastians «Goldbergvariasjonar».
Cyriacus Wilche (ca. 1620–1667) er med på plata sidan han truleg var bestefar til Johann Sebastians andre kone, Anna Magdalena Bach. Hans Battaglia er morosam. Dette er ein musikalsk slagscene av typen som var populær på 1600-talet, med marsjar, imitasjon av kanonsmell, sørgjesongar og sigersfanfarar. Utan samanlikning best er likevel dei tre sluttspora med Johann Sebastians alt nemnde forspel til «Påskeoratoriet», der musikken løfter seg til eit heilt anna nivå.
Sjur Haga Bringeland
Sjur Haga Bringeland er musikar, musikkvitar og fast musikkmeldar i Dag og Tid.
Fleire artiklar
Lars Elling har skrive eit portrett av venen Stian Carstensen.
Foto: Trond A. Isaksen
Singel og sanatorium
Lars Elling skriv sprudlande, intelligent overskotsprosa
frå sinnets undergrunn.
Oppsettingar og konsertar er ein viktig og synleg del av skolegangen på musikklinjene. Her frå Hakkebakkeskogen ved Stord vidaregåande skule.
Foto: Stord vgs
Kampen om kunstfaga
Om kunstfaglege linjer ved vidaregåande skolar har livets rett, er ein årleg debatt når elevplassar og kroner skal fordelast.
Den norske fiskeflåten er mangfaldig. Her er ringnotfartøy ved kai i Egersund våren 2017.
Foto: Per Anders Todal
Fiskar er fiskar verst
Striden om kvotemeldinga kan få Fiskarlaget til å rivne.
Mannsutvalet saman med kultur- og likestillingsminister Lubna Jaffery under overrekkinga av rapporten.
Foto: Ole Berg-Rusten
Vil avlive likestillingsmytar
Forskar Mari Teigen ønskjer seg ein kjønnsdebatt bygd på kunnskap.
Statsministeren i Storbritannia, Rishi Sunak, har varsla at dei fyrste flya mot Rwanda skal vere i lufta løpet av ti til tolv veker.
Foto: Toby Melville / Reuters / NTB
Vil nytte Rwanda
som asylskremsel
Den som prøver å ta seg til Storbritannia med båt over Den engelske kanalen for å søkje asyl, risikerer i framtida å verte sett på eit fly til Rwanda utan høve til å returnere.