Folkemusikk

Kim
Rysstad:

Or Setesdal

Ta:lik

Kvedaren Kim Rysstad har markert seg tydeleg som ein av våre fremste formidlarar av vokalmusikk frå Setesdal. Samstundes har han òg sysla mykje med populærmusikk, mellom anna som deltakar i NRKs underhaldingsprogram Stjernekamp. På denne plata vender han attende til kjeldene sine – for det meste solistisk – men på somme av songane har han fått med seg gitarist Trym Bjønnes, felespelar Daniel Sandén-Warg og kvedarane Eldbjørg Trydal Rysstad og Kirsten Bråten Berg. Sistnemnde har dessutan vore lærar for Kim.

Dei tolv spora på plata er fordelte mellom dei vanlegaste formene for folkesong i dalen, som stev, bånsullar, balladar, nyare viser og religiøse folketonar. Dette er såleis ei fin innføring i denne songtradisjonen. Framføringane held høgt nivå, men det er trygt og traust og ingen overraskingar. Og det er neppe meininga heller. Dette prosjektet har eit pedagogisk preg som nok er meir spanande for ferske folkemusikkentusiastar enn kjennarar av setesdalsmusikken.

Utvalet er representativt, men det er litt merkeleg at den einaste salmetonen er «Frykt, mitt barn, den sanne Gud», som er temmeleg lik den tyske versjonen av melodien som me finn i koralbøkene i kyrkja, når det er så mange langt meir originale melodiar å velja mellom.

Også boka som hyser CD-en, er ei grunnleggjande innføring i vokal folkemusikk generelt og dei vanlegaste sjangrane i tillegg til presentasjon av utøvarane og dei viktigaste kjeldene. Tekstane er kortfatta og ukompliserte, men likevel presise. Alle tekstane er dessutan omsette til engelsk. Boka er vakkert utstyrt, med stive permar og nyare og eldre fotografi. Og så er ho med på å gjera boka og plata til allmenn folkeopplysing meir enn akademisk formidlingsprosjekt. Dermed er dette ei framifrå innføring i setesdalssongen.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.