For fleire i min generasjon er dei første møta med teiknefilmane om Knøttene, baserte på teikneseriane til Charles M. Schulz, gode minne frå unge år. Når ein tenkjer tilbake på stundene framfor skjermen, er dei uløyseleg knytte til musikken og lydsporet. Bak tonane stod jazzpianisten Vince Guaraldi (1928–1976), og med nye It’s The Great Pumpkin, Charlie Brown har vi fått den beste utgåva som samlar denne musikken så langt. Når «Snoopy And The Leaf» fyller rommet, er det ikkje til å kome forbi at ein vert mint på kor kul den hunden eigentleg var, idet lyden av fløyta til Ronald Lang fører oss strake vegen til det vesle hundehuset og alt som omgir det, i Schultz’ univers.

Det var visst Lee Mendelson som fann på å hente inn Guaraldi til dette arbeidet, ein gong han var på radioen då TV-produsenten køyrde over Golden Gate-brua i San Francisco. Etter kvart som teiknefilmane vart ein internasjonal suksess, vart også Guaraldi ganske rik, men han døydde altfor tidleg, i ein alder av 47 år. Han rakk likevel å introdusere jazzen som sjanger til ei heil rekkje småbarn verda over i løpet av levetida. It’s The Great Pumpkin, Charlie Brown dokumenterer på sitt vis denne innverknaden.

Øyvind Vågnes