Eit segment av dei som framleis kjøper musikk på LP eller CD, kan ikkje få nok kuraterte tematiske nyutgjevingsantologiar på plateselskap som Soul Jazz, Rhino, Ace, Light In the Attic og Bear Family.

Sistnemnde verksemd med tilhald i ein småby nord for Bremen stod for ei uslåeleg bragd i sjangeren då dei i 2018 gav ut den prislønte 13 x CD-boksen Next Stop Is Vietnam. The War On Record 1961–2008. 300 songar dokumenterer den traumatiske amerikanske erfaringa av krigen i Asia og krigen heime. Det heile sett saman av musikologen Hugo A. Keesing, komplett med ei rikt illustrert hardcoverbok i LP-format som over 304 sider kommenterer kvar einaste song.

Amerikanarane tapte i Vietnam, men dei lukkast med å spreie halloween. Bear Family har i mange år også hatt den musikalske undersjangeren Monster/Horror/Halloween i katalogen. Korleis blei dette ein del av rocken? Då TV invaderte dei amerikanske forstadene og mor og far blei sitjande heime, satsa filmindustrien på drive-in-kino og kjipe horror-b-filmar for dei unge. Slik blei Dracula, Frankenstein og zombiar til referansar i ungdomskulturen. Det var berre å hive seg på. «I Put A Spell On You», song Screamin’ Jay Hawkins og blei kongen av sjokk’n’roll.

Øyvind Pharo

Øyvind Pharo er litteraturvitar, musikkskribent og DJ.