I dag kjem Under Cover ut, og det er første gong vi høyrer frå Valerie June sidan det kritikarroste albumet The Moon and the Stars: Prescriptions for Dreamers kom ut i fjor vår. Det finst nok lesarar som vil kjenne til utgivingane soulartisten frå Tennessee har komme med opp gjennom åra, inkludert Pushin’ Against a Stone (2013), som vart produsert av Dan Auerbach. Denne gongen har June bestemt seg for å tolke artistar som har vore viktige for henne.

Fiffig titulerte Under Cover vert omtalt av artisten sjølv og plateselskapet Fantasy Records som ein EP, men plata rommar heile åtte spor handplukka av June, noko som har ført til ein ganske så variert miks. Somme av låtane er ganske ihelspelte i originalversjonen, som John Lennons «Imagine», andre høyrer ein berre frå tid til anna, som Mazzy Stars nydelege «Fade Into You» eller Gillian Welchs «Look at Miss Ohio». Valerie June har sin eigen inngang, anten det er Dylan eller Nick Cave ho tek tak i, eller ikkje minst den flotte versjonen av Frank Oceans «Godspeed», som for denne lyttaren er høgdepunktet på utgivinga.

Øyvind Vågnes