Året var ikkje mange vekene gammalt då The Weather Station gav ut Ignorance, ei plate som fekk meg til å slå i bordet og hente fram dei store orda på desse sidene, idet eg meinte at utgivinga kom til å stå fram som ei av dei beste platene i 2021. Det ser eg ingen grunn til å trekkje tilbake åtte månader og ein million lyttingar seinare, særleg ikkje etter at Tamara Lindeman no like godt har gitt ut plata på nytt, i ei såkalla de-luxe-utgåve (fysisk format, inkludert eit dobbelt vinylalbum, kjem om nokre veker). 

I tillegg til sjølve plata får vi to sider til, med alternative versjonar av songane, og to spor som ikkje kom med på Ignorance, «Look» og «Better Now». Kvaliteten er høg, både på det vi ikkje har høyrt før, og det som kjem i ny tapping.

Særleg fascinerande er det å høyre Lindeman ta det heilt ned i ein pianoballadevri på «Parking Lot», som her framstår som ein heilt annan song, heilt på høgde med plateversjonen og vel så det. På «Better Now» går assosiasjonane ganske fort til Kate Bush, men det har i alle fall ikkje eg noko imot. 

Om nokre veker tek The Weather Station til på ein turné som skal ta dei gjennom Canada og USA, før dei på vårparten kryssar Atlanteren og kjem til Europa, mellom anna til Oslo, den siste dagen i mars. Det vert ein av konsertane neste år som eg har aller høgast forventning til.  

Øyvind Vågnes