Eg kom til å høyre Kinky Friedman (f. 1944) snakke så fint om Jerry Jeff Walker (1942–2020) i eit gammalt opptak for litt sidan, og det fekk meg til å tenkje at eg burde nemne plata Steve Earle og The Dukes gav ut til minne om Walker, Jerry Jeff, no i vår.

Målet med albumet – som kjem etter at Earle dei siste åra har laga fleire utgivingar til minne om låtskrivarar som Townes Van Zandt (1944­–1997), Guy Clark (1941–2016) og sin eigen son Justin Townes Earle (1982–2020) ved å tolke songane deira – er nok å vise at Walker laga så mykje meir enn songen mange vil hugse han for, «Mr. Bojangles» (tittelsporet på tredjeplata som kom i 1968, og som også er med her).

På Jerry Jeff møter du ikkje minst den kontemplative Jerry Jeff Walker, som i versjonar av «Little Bird» (på Mr. Bojangles) og «Wheel» (opphavleg på Viva Terlingua, 1973). Trubaduren gjorde seg først gjeldande i Greenwich Village i New York, før han forflytta seg til Austin, og ein kan høyre forankringa i både folk og country når ein lyttar til Earle og bandet.

Øyvind Vågnes