Eg kan ikkje gjere anna enn å spisse øyra når Radiohead løftar fram Kid A (2000) og Amnesiac (2001), og leitar fram og samlar anna materiale frå perioden i ein tredje albumkonstellasjon dei no kallar Kid Amnesiae, «eit minnepalass av halvhugsa og halvgløymt materiale», som det heiter i ei pressemelding, og gir ut det 34 spors store beistet som trippelalbumet KID A MNESIA (med karakteristisk kul omslagskunst ved Stanley Donwood).

Ein smakebit har vore å høyre ei stund, nemleg den beint fram nydelege «If You Say the Word». (Korleis kan denne songen ha vorte liggjande så lenge?)

Eg held Kid A for å vere ei av dei store utgivingane på denne sida av millenniumsskiftet. Det var den første plata eg skreiv om her i avisa, over ei heilside, då ho kom ut i oktober 2000. Kid A har den rette etterklangen, skreiv eg den gongen, og det står eg for enno. Det var ei særs kreativt utprøvande tid for Radiohead, og også det som vart liggjande, eller ikkje fekk nok merksemd, er vel verdt ein lytt, ikkje minst i samla form på KID A MNESIA.

Øyvind Vågnes