Kanskje vil somme av lesarane som likar å gå i platebutikkar, kjenne til legendariske Amoeba Music? Den californiske musikkinstitusjonen opna først i Berkeley, i 1990, og deretter følgde San Francisco og Los Angeles, alle tre stader med så store utval at det har gjort meg heilt perpleks å komme dit. Men Amoeba lever også eit virtuelt liv, med ein vital YouTube-kanal (skapt i 2006). For litt sidan gjorde ein musikkinteressert meg merksam på serien What’s In My Bag?. Det er eg glad for, for det dreier seg om ei aldri så lita gullgruve.

Konseptet er enkelt, og det er smart reklame: Musikkprofilar får snakke heilt kort og entusiastisk om plater dei held høgt, og slik inspirere til lytteglede (og ein tur i ein butikk). Den omfattande gjestelista er rik og mangfaldig, og ho peikar i alle slags retningar, utifrå alle tenkjelege kategoriar.

I episode 785 vandrar Arooj Aftab mellom hyllene i butikken i San Francisco og fortel om Billie Holiday. I episode 334 fortel Chuck E. Weiss om livet som platesamlar og om lidenskapen for 78-plater. I utgangspunktet er serien trass alt skapt for dei som finn vegen til slike plassar, og som til dømes ønskjer å høyre Dan Auerbach snakke om Everly Brothers eller Kim Gordon snakke om avantgardejazz. Litt kjendiseri er det likevel plass til, for folk som Ben Stiller dukkar opp mellom slaga. Her er det altså noko for alle.

Øyvind Vågnes