Tanya Tucker var ein yppig fjortenåring då ho ga ut debut-LP-en Delta Dawn i 1972. Nashville-produsenten Billy Sherill var ein ringrev som visste at kjernen i all countrymusikk er storytelling, og handplukka vågale songar tilpassa den djupe og twangy røysta til Tanya. Cowboyjenta høyrdest ut som ei krysning av Nancy Sinatra og Brenda Lee og gjekk rett heim hjå publikum i ei kulturell brytningstid for USA.

Tittelsporet på Delta Dawn blei ein gigantisk hit til liks med albumet. Hovudpersonen i songen er ei jente så fager som daggry over Mississippi, men livet hennar blir ein sørstatsgotisk fabel om forelsking, småbysladder og galskap. Dei to påfølgjande LP-ane er også milepålar: What’s Your Mama’s Name med tragedien «Blood Red and Goin’ Down» og Would You Lay With Me (In a Field of Stone), der tittelsporet, som blei ein nr.1-hit, gjorde at David Allen Coe, som hadde skrive teksta, fekk fart på eigen karriere.

Som vaksenartist blei Tucker meir mainstream, men i 2019 var ho sterkt tilbake med While I’m Livin’ med radarparet Brandi Carlile og Shooter Jennings som produsentar. Dei står også bak Sweet Western Sound, ei av dei beste americanaplatene i 2023, året då Tanya Tucker også fekk plass i Country Music Hall of Fame.

Ho høyrest framleis ut som jentungen frå 1972.

Øyvind Pharo

Øyvind Pharo er litteraturvitar, musikkskribent og DJ.