Radiomannen John Peel (1939–2004) var ei musikklegende, med utrøytteleg og iherdig formidling for BBC Radio 1 frå 1967 og heilt fram til han gjekk bort. Særleg vart han kjend for Peel Sessions, der artistar kom innom studio og heldt ein minikonsert (gjerne med fire songar). Fleire store namn fekk eit større publikum for første gong på denne måten. Meir enn 4000 slike økter vart det til slutt, med over 2000 artistar, og ein del gav Peel ut som EP-plater på sitt eige Strange Fruit Records frå 1986 og frametter.

Mengda med utgivingar er for stor til at strøymetenestene har gjort dei tilgjengelege, men så finst det folk som bloggaren Dave Strickson, som har alfabetisert alle Peel Sessions han har funne på YouTube på ei eiga side. For ein ressurs! Det er duka for Peel-sommaren 2022, med alt frå Cocteau Twins til Fleetwood Mac til John Cale til PJ Harvey til... Du skjøner teikninga. Stricksons oversikt med lenker finst her: https://davestrickson.blogspot.com/2020/05/john-peel-sessions.html.

Øyvind Vågnes