Multiinstrumentalisten og songaren Ivan Neville (63), son av sølvstrupen Aaron Neville, kjem frå ein familie av New Orleans-musikarar som har skapt stor rhythm & blues, jazz, soul og funk. To av onklane hans var med i funkbandet The Meters, som blei oppløyst i 1977. Dei to tok med seg ein tredje onkel og danna supergruppa The Neville Brothers saman med Aaron. Dei tok verda med storm, og unge Ivan blei etter kvart også med.

På det ferske eigenproduserte soloalbumet Touch My Soul, det første frå Ivan Neville på ein mannsalder, er det som The Meters og Neville Brothers er tilbake, denne gongen med Nevilles eige Dumpstaphunk som studioband. Talking Heads’ «This Must Be the Place» er einaste coverlåt, i skrivande stund 40 år sidan songen kom ut på LP-en Speaking In Tongues 1. juni 1983. Her går New Orleans og New Wave opp i ein høgare einskap av polyrytmikk og brassband.

Om albumet seier Ivan Neville at det er inspirert av den hypnotiske funken på Sly And the Family Stone-LP-en Fresh, og denne ferskvara har 50-årsjubileum i juni. Her gjer Sly ein psykedelisk versjon av Doris Day-slageren «Que Sera, Sera (Whatever Will Be, Will Be)». I Noreg vart songen udøyeleggjord av Nora Brockstedt i 1957 med «Det som skjer, det skjer», omsett av Arne Bendiksen.

Øyvind Pharo