Afroamerikanske Jerry Williams jr. starta i musikkbransjen som tolv år gamal plateartist under namnet Little Jerry. I tenåra blei han songskrivar, produsent og A&R-mann Little Jerry Williams og rhythm & blues-songar. Saman med songaren Gary U.S. Bonds skreiv han «She’s All I Got», som blei soulhit med Freddie North, mega countryhit med Johnny Paycheck i 1972 og Song of the Year-nominert av Country Music Association.

I mellomtida hadde Jerry Williams jr. tatt sin første LSD-tripp og blitt artisten Swamp Dogg som blanda røtene sine frå sørstatssoul med satire og anarkopolitikk i ein gumbo av Zappa og P-Funk. På ein av dei første LP-ane sine, Cuffed, Collared and Gagged, spelte han inn John Prine-songen med refrenget «There’s a hole in Daddy’s arm/ where all the money goes» om krigsveteranen Sam Stone. Songen blei avsluttingsnummeret på konsertane til Swamp Dogg.

I americanatider som desse veks tilhengarskaren hans. Det nye albumet Blackgrass: From West Virginia to 125th St. seier at country og soul er uskiljelege, slik som når gjestande Margo Price nytolkar deep soul-klassikaren «To the Other Woman» frå Doris Duke-albumet I’m A Loser, produsert av Swamp Dogg i 1970.

Øyvind Pharo

Øyvind Pharo er litteraturvitar, musikkskribent og DJ.