Det var i januar Phosphorescent sleppte ei tolking av «Bad News From Home», ein ganske dyster song om svik og fortviling, opphavleg å finne midtvegs på Randy Newmans Land of Dreams (1988). Det var første singel i serien The Full Moon Project, og etterpå har songane komme i tur og orden, kvar månad: «I’m a Mess» (frå Nick Lowes The Convincer, 2001); sjølvaste «Like a Rolling Stone» (frå Bob Dylans Highway 61 Revisited, 1965); tittelsporet på Tom T. Halls Homecoming, 1969; «To Love Somebody», ein av låtane av Barry og Robin Gibb som var med på Nina Simones album med same namn frå 1969; og for eit par veker sidan Vern Gosdins «Any Old Miracle» (frå Nickels and Dimes and Love, 1993).

Kva er bakgrunnen for serien? Då Matthew Houck gav ut den første songen på nyåret, gjorde han det klart at han hadde lyst til å gi ut musikk utanfor det han kalla «the modern album release cycle». Han erklærte at det frå no av skulle komme ein song frå han ved kvar fullmåne, først tolkingar, og så får ein vel sjå etter kvart – prosjektet skal etter planen halde fram «for the rest of my natural life».

Øyvind Vågnes