Av alle dansefarsottar som har råka den vestlege verda, har ingen hatt større verknad enn twist. Pardansen forsvann, og unge svikta både danseskulen, vals og swing. Gutar droppa frisøren, for dei ville ha luggen som John Lennon rista på når han song «Twist and Shout».

For seksti år sidan no i april hadde The Beatles dei fem første plassane på Hot 100 i USA, med twistlåten som nummer to. Hysteriet som starta fem år tidlegare, med Hank Ballards «The Twist» og coverversjonen til Chubby Checker, gleid inn i Beatles-hysteriet.

Dansarane i TV-program som American Bandstand lanserte stadig nye variantar. Rhythm & blues-klassikaren «Land of Thousand Dances» med New Orleans-songaren Chris Kenner ramsar opp rundt tjue av dei.

Med gospelbakgrunn brukte han lovsongen «Children, Go Where I Send Thee» som mal og forkynte med uklanderlege rimmønster:

Got to know how to Pony

like Bony Moronie

The Mashed potatoes

Do the Alligator

Then you do The Fly

With a Hand Jive

Dei tusen dansane inspirerte innspelingar frå Ola & The Janglers og Tom Jones til Wilson Picketts monumentale versjon med: «Do you know how to twist/ It goes like this /Get down on your knees»… Har du sjekka hofterørslene dine i det siste?

Øyvind Pharo

Øyvind Pharo er litteraturvitar, musikkskribent og DJ.