Då gitarfantomet Junior Brown gav ut debutalbumet 12 Shades of Brown i 1990, var han leiar av husbandet på namngjetne Continental Club i Austin i Texas. Sjølv i ein by som er eit drivhus for strengemeistrar, skapte han sensasjon med spelet på sin sjølvbygde «guit-steel», ein tohalsa hybrid av steel- og elektrisk gitar. Med den sprengde han alle tenkelege sjangergrenser med kanonadar av surfgitarriff, Jimi Hendrix-blues, Link Wray-feedback og all slags exotica.

Men kjernerepertoaret til Brown har alltid vore tradisjonell honky tonk, western swing og rockabilly frå ølsveitte vegkroer og dansehallar. Den djupe, flate og knastørre songstilen lærte Brown av platene og TV-showa til The Texas Troubadour, Ernest Tubb, som i 1941 spelte inn «Walking the Floor Over You».

Med denne plata skapte han honky tonk-sjangeren og introduserte samstundes elektrisk gitar i countrymusikken. Gjennom heile karrieren rekrutterte Tubb dei beste av dei beste musikarane til bandet sitt. I sitt kommersielle toppår 1949 introduserte Tubb også «Blue Christmas», som han gjorde til ein honky tonk-song om avvist kjærleik. Elvis Presley-versjonen nokre år seinare var eit anerkjennande nikk til Ernest Tubb.

12 Shades of Green kom ut få år etter at Tubb var gått bort. I opningssporet «My Baby Don’t Dance to Nothing But Ernest Tubb» syner Junior Brown kor sterkt det musikalske avtrykket hans var.

Øyvind Pharo

Øyvind Pharo er litteraturvitar, musikkskribent og DJ.