I haust bestemte Legacy Recordings, katalogavdelinga i Sony Music som har teke seg av arkiva til Columbia Records og Epic Records sidan 1990, då Sony kjøpte CBS Records, seg for å feire det faktum at det hadde gått eit halvt hundreår sidan Billy Joel byrja å gi ut plater.

Ein boks samla dei seks første albuma hans i ny utgåve, med gamle og nye konsertopptak, og dokumenterte artistens 1970-tal. Og no følgjer dei opp: Ei artig ny nettside (https://nysom.billyjoel.com/) lèt eit interaktivt kart over New York føre deg strake vegen inn i nostalgien, med mangt knask for nye og (mest) gamle lyttarar.

Som følgje til sida har Joel gitt ut Places, ein EP som peilar oss inn mot nokre av destinasjonane på kartet: «New York State of Mind», «Movin’ Out (Anthony’s Song)», «Big Man on Mulberry Street», «Everybody Loves You Now», og «Miami 2017 (Seen the Lights Go out on Broadway)».

Billy Joel (f. 1949) platedebuterte med Cold Spring Harbor (1971), og oppfølgjaren Piano Man (1973) finst nok i ein god del norske platehyller. På platefronten har det vore ganske stille frå den kanten sidan River of Dreams (1993), men det har ikkje forhindra fulle hus og god stemning rundt om på planeten.Ikkje minst gjeld dette heimbyen New York – Joel ser ikkje ut til å kunne ha konsert i Madison Square Garden utan å selje ut.

Øyvind Vågnes