Det finst berre eitt konsertopptak med Ann Peebles & The Hi Rhythm Section, laga på det segnomsuste Peabody Hotel i Memphis ein februarkveld i 1992. For litt sidan vart det gitt ut på plate, med tittelen Live in Memphis (Memphis International) – musikk som gjer stega dine litt lettare over stovegolvet.

The Hi Rhythm Section var husbandet til plateselskapet Hi Records og romma dei tre talentfulle brørne Mabon (gitar), Leroy (bass) og Charles (orgel) Hodges, og Archie Turner (tangentar), Howard Grimes (trommer) og Thomas Bingham (gitar), ein gjeng produsent Willie Mitchell samla på siste halvdel av 1960-talet – ei gruppe musikarar som vart sentrale på ei rekkje Memphis-plater, av folk som Peebles og Al Green.

Sjølv om glansdagane kanskje høyrde til fortida vinteren for tretti år sidan, svingar det durabeleg av denne gjengen, som også denne kvelden romma blåsarar og koristar, med ein Peebles i knallform. Dette er klassisk soul, framført av folk som var med på å definere sjangeren. Høyr til dømes på avslutningssporet, ein versjon av tittelsporet på albumet I Can’t Stand the Rain (1974), ei plate mange løftar fram når ein skal nærme seg Peebles’ diskografi.

Øyvind Vågnes