Jazz

Marius Klovning:

Late Nights, Early Mornings

Marius Klovning, gitarar
NXN Recordings

Ikkje før hadde Marius Klovning som ein del av bandet Flukten debutert med Velkommen håp, så er han aktuell med soloplate. Late Nights, Early Mornings er ein oppfølgjar til Hagebyen, som kom for to år sidan.

Enkelt og lyrisk

Både komposisjonane og gitarspelet til Klovning i Flukten, Skadedyr og Hullyboo har attkjennelege særdrag. I Bogue Chitto (m/ Mattis Kleppen og Are Rosseland) er påverknaden frå norsk og vestafrikansk folkemusikk tydlegare, men i soloprosjektet møter ein ein heilt annan estetikk.

Dei skakke vriane både rytmisk og harmonisk er fråverande. Vekke er også den ironiske humoren. Det er noko enkelt, lyrisk over musikken. Ein merkar inspirasjon frå norsk folkemusikk i låtar som «Grandfather’s Waltz» og «The House» og countrymusikken i «Late Nights» og «Early Mornings», men framfor alt er musikken ei hylling til den akustiske gitaren.

Gitararsenal

Arsenalet av gitarar som Klovning brukar, er sett saman av ein Strand OM, Gibson J-45, Gretsch Dobro, ein variant av Martin OM og ein gamal nylonstrengar som blei berga frå ein vanlagnad på ei familiehytte.

Strand-gitaren spelar hovudrolla, og komposisjonane og spelet til Klovning og opptaka, miksen og mastringa til Hans Martin Austestad. Dette er ikkje ei plate berre for gitaristar, men eg trur denne talrike gruppa vil setja spesielt stor pris på innspelinga.

Lars Mossefinn

Lars Mossefinn er frilans journalist og fast jazzmeldar i Dag og Tid.