Folkemusikk

Kalejdoskop Trio

Kalejdoskop

Sofia Hultqvist Kott: song, shrutibox
Gard Nergaard: hardingfele, oktavfele
Albin Myrin: klarinett
Gammalthea

Sentrale kjenneteikn for det ein kallar folkemusikk, er ofte at musikken er knytt til ein særskild region eller ein brukssituasjon, til dømes dans, leik, bryllaup, gravferd eller religionsutøving.

Slik kan det framleis vera, men det som er vanlegare, er at folkemusikk er noko ein bestemmer seg for å halda på med, som eitt av mange stilistiske og geografiske alternativ.

Slik er det også med Kalejdoskop Trio, som her kjem med si første plate.

I presseskrivet kunngjer plateselskapet at me får høyra «domedagskoralar, inderlege viser og feitt slåttespel i eit prisme av den nordiske folkemusikken». Og det er nettopp denne samansetjinga av ulike element som karakteriserer prosjektet. To svenske og éin norsk musikar blandar musikk frå ulike stader og historiske brukssituasjonar utan blygsel.

Ei slik tilnærming er dei ikkje åleine om, noko som kan ha samanheng med at det er godt samarbeid mellom nordiske utdanningsinstitusjonar som tilbyd folkemusikkstudium, og det finst mange folkemusikkfestivalar og spelestader som tener som møtestad for unge entusiastar på leit etter nye impulsar og musikalske samarbeidspartnarar.

I utgangspunktet kan det verka som Kalejdoskop Trio spriker i litt for mange retningar, men det er likevel ein heilskap i det, fordi musikarane har funne ein god balanse mellom songstemma og instrumenta og arbeidd med å få instrumenteringa til fungera.

Dei melodiske utgangspunkta er tradisjonelle, men det ferdige resultatet er prega av nett desse tre musikarane sitt tette samspel og felles utforma arrangement, som av og til er rytmisk orienterte og av og til droneprega og meditative.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.