Lars Kjemphol

Jugendstilsenteret og Kube, Ålesund

3. juni–16. oktober

Mannen som gjorde skateboard til kunst, stiller ut på Kube. Kjemphol har mellom anna bygd ein diger installasjon, særskilt utforma for første etasje. Gjennom kunsten sin fremjar han ønsket om eit fysisk samspel med publikum. Her er kunst du kan rulle med.

Lene Berg. Festspillutstillinga 2022: Fra Far

Bergen kunsthall

26. mai–21. august

Utstillinga krinsar om faren, filmregissøren og forfattaren Arnljot Berg, som var kjend i samtida, men er så godt som gløymd i dag. Ho tek utgangspunkt i eit dramatisk barndomsminne: den gongen faren vart fengsla i Paris, mistenkt for drapet på stemora hennar. Gjennom å rekonstruere minne, mellom anna gjennom å iscenesette filmscener og foto, løftar Berg fram spørsmål om skuld, identitet, minne, sanning og fantasi.

Anti-monument III

Austråttborgen

21. mai–14. august

Kurator: Solveig Lønmo, Nordenfjeldske Kunstindustrimuseum

I år er også Austråttborgen del av Hannah Ryggen Triennalen. Det kviler eit historisk sus over den praktfulle herregarden, som har husa mektige menneske sidan tidleg mellomalder. I den storslegne borga er ei utstilling med Anne-Karin Furunes, Matilde Westavik Gaustad, Veslemøy Lilleengen, Marthe Minde, Per Kristian Nygård, Anusheh Zia og Hannah Ryggen.

Blikk på metall

Peder Balke-senteret,
Østre Toten

14. mai–12. juni

Utstillinga gir innblikk i det store spennet av metallkunst som finst i Noreg. Gruppeutstilling med verk av Ellen Karin Mæhlum, Giske Sigmundstad, Cathrine Alice Liberg, Pål Vigeland, Leif Stangebye Nilsen, Aron Li og David og Linnéa Calder.

Jan Groth. Forløp og volum

Stavanger kunstmuseum

6. mai–4. september

Omfattande mønstring av Jan Groth (1938–2022), som gjekk bort 2. mars i år. Museet viser fleire av dei store vevnadene med kvit strek på brunsvart botn som han er så kjend for. Eg vil dessutan framheve dei fire veggteikningane som er skapte spesielt for museumssalane, noko av det siste kunstnaren laga før han døydde.