Swinguerra

Kunsthall Stavanger

23. september–9. januar

Bárbara Wagner og Benjamin de Burca laga filmen til den brasilianske paviljongen på Veneziabiennalen i 2019. Denne energibomba av ein film gir innblikk i den vitale dansekulturen i dagens Brasil, ei tid med stor politisk og sosial uro.

Flukten fra fornuften. Nordisk kunst og det okkulte

Sørlandets Kunstmuseum, Kristiansand

28. oktober–6. februar

Utstillinga er ei utforsking av korleis spirituelle straumdrag har påverka nordisk kunst frå tidleg på 1900-talet fram til vår tid. Utstillinga kastar eit breitt blikk på det okkulte som ein stadig skiftande sosial og filosofisk prosess. Kuratoren Zaena Sheehan er vinnar av AKO Curatorial Award 2020.

Marit Helen Akslen. Lost Connections

KUBE, Ålesund

5. november–27. februar

Lost Connections er ein omfattande presentasjon av tekstilkunsten til Marit Helen Akslen (f. 1971 i Ålesund). Utstillinga strekker seg over to etasjar og viser nye arbeid så vel som sentrale verk frå de siste 20 åra. Arbeida viser politisk og feministisk engasjement, ofte i ei poetisk og subtil form, ikkje sjeldan med snert og humor.

Halvor Rønning. Avgang

Hordaland kunstsenter

27. november–9. januar

Med bidrag frå Attilia Fattori Franchini, Philipp Kleinmichel, Per-Oskar Leu, Tiffany Sia, Sabrina Tarasoff og Nikhil Vettukattil.

Nye måleri, kollasjar og teikningar av Halvor Rønning. Han tematiserer det målariske uttrykket sin plass i vår tid. Som publikum kan ein få opplevinga av å kome for seint til å få med seg skapingsprosessen. Det som står att, er restane, som er forsøkt vaska bort – utgnidde linjer, ein tom stol. I andre etasje vert det vist videoverk av fleire kunstnarar. Det er også laga ei kunstnarbok.

Henrik Vibskov. (Please!) Clean up, honey

Lillehammer Kunstmuseum

20. november–27. mars

Den danske moteskaparen Henrik Vibskov viser installasjonar, mote og video. På prangande, frodig og høgst uortodoks vis kastar Vibskov seg ut i tema som miljø, berekraft og teknologisk nærvær. I denne sanselege utstillinga kjem ein tett inn på verka. Her kan ein prøve på seg designklede, sjå filmar av catwalks, også sceneframsyningar. Han teikna mellom anna kostyma til balletten A Swan Lake av Alexander Ekman for Den Norske Opera (2014).