Jone Skjensvold – Portraits of the sun | Simple rules

Kunstbanken, Hamar

3. november–30. desember

Jone Skjensvold viser to seriar med måleri som er inspirerte av naturen utanfor atelieret ytst i havgapet på Stad. Motiva er forenkla til enkle, presist utforma geometriske former. Her er fargen i hovudsetet, finstemde skildringar av atmosfærisk lys. I serien Simple Rules utforskar han romverknader med overlappande transparente fargeflater.

Vanessa Baird & Mette Hellenes

Stenersensalen i KODE 2, Bergen

9. november–3. februar

Utstillinga er todelt. I den eine salen har Vanessa Baird kledd veggane med sterke skildringar av baksida ved samfunnet vårt. Den teikna installasjonen «You Are Something Else» viser brutale overgrep, flyktningar som druknar, alt fletta inn i symbol og bilete frå populærkulturen.

I resten av utstillinga vert vi nærare kjende med universet som Baird har bygd opp saman med Mette Hellenes. Her er satireteikningar frå teikneserien Kebbelife, som sparkar mot kunstmiljø og kunstpolitikk, og illustrasjonar frå dei nyaste bøkene deira.

Parabiose

Hå gamle prestegard, Nærbø

17. november–6. januar

Gruppeutstilling: Sverre Malling, Tanja Thorjussen, Johannes Høie, Gry Hege Rinaldo, Harald Lien, Danny Larsen og Tom S. Kosmo

Dei sju kunstnarane har arbeidd mot utstillinga over lang tid. Resultatet har blitt frodig. Temaet er parabiose, eit omgrep som vert nytta om organismar som lever tett saman med andre planter og dyr. Kunstnarane har sett på samhandling i naturen, òg mellom menneske og natur. Kvar går grensa mellom samhandling og snylting, og når er forholda til gjensidig nytte?

Jakob Weidemann

Sørlandets Kunstmuseum, Kristiansand

17. november–24. mars

Utstillinga er ein brei presentasjon av Jakob Weidemann, som er rekna som pioneren for utforminga av det abstrakte måleriet i Noreg. Her får vi sjå nye sider ved kunstnaren. Utstillinga syner mellom anna ei rekke tidlege og meir ukjende måleri frå førti- og femtitalet. I desse tiåra utforska han rammene for det moderne måleriet og la fundamentet for dei uttrykksfulle abstrakte naturstemningane han vart så kjend for.

Ina Otzko:
«Jeg er her, kan du føle det?»

Bodø Kunstforening

10. november–23. desember

Gjennom installasjon, skulptur, video og foto utfordrar Otzko oss til å kjenne på evna til å føle nærvær, å vere til stades i eige liv, og gjennom dette kjenne på ansvaret vi har. Delar av utstillinga tek føre seg vulkanen Solfatara vest for Napoli. Han er sovande, men rumlar og spyr ut svoveldamp. Solfatara er ein kjend turistattraksjon og ligg endåtil kloss inntil ein by. I utstillinga vert vulkanen symbol på den sårbare balansen mellom forsvarleg forvalting av naturen og det aukande presset på dei same ressursane.