Barnebok

Rune Belsvik:

Dustefjerten og den store sommarferieturen

Cappelen Damm

­

I det vesle landet ved bekken er det tid for den store sommarferieturen.

Fantasiskapningane som bur her, er vanskelege å kategorisere, dei er både barn og vaksne, dyr og menneske. Namn som Dustefjerten, Oktava, Kavringreven og Bollefisen får det til å rykke i smilebandet og set fart i fantasien. Figurane har avgrensa, tydelege eigenskapar.

Store anslag og puslete realitetar er eit kjenneteikn ved den varme komikken til Rune Belsvik. Snart skjønar lesaren at det ikkje dreier seg om rare turen. Oktava lagar likevel nokre velmeinte reglar for utfarten opp i skråninga bak huset til Dustefjerten:

1. Vi skal vera i godt humør.

2. Vi skal kosa oss.

3. Vi skal vera snille med kvarandre.

Dustefjerten gruar seg. Han håpar at nokon blir sjuke, slik at dei må snu og dra heim att.

Kvalitetane i Rune Belsvik-universet finst langs to spor: Det eine går på innsida av det kjende, det barnet straks vil forstå og gle seg over. Både figurane, dialogen mellom dei, skildringane og strukturen i forteljinga vender seg til lesaren gjennom det gjenkjennelege. Det andre sporet utfordrar, skaper undring og fører lesaren vidare. Forventningar vert brotne, karakterane er komplekse. I språket finst nye og uvande, men vedunderlege bilete: «Bekken sildra gjennom landet. Han var som eit langt kjølig sjal tvers over sommaren sin mage.»

Forteljingane om Dustefjerten finst også som lydbøker.

Janne Karin Støylen

Janne Karin Støylen er bonde og litteraturvitar.