Biletbok

Akin Duzakin:

Kjempen

Vigmostad & Bjørke

Akin Duzakin er mellom våre fremste og mest omtykte illustratørar. I nokre få høve har han også skrive tekstane i biletbøkene han illustrerer sjølv. Denne delen av kunstnarskapet vert vidareutvikla i Kjempen.

Kjempen herjar i den mørke skogen, med bjørnekropp og ulvekjeft. Ein dag fell han utfor stupet og slår seg så stygt at han gløymer alt om seg sjølv. Dyra i skogen legg ein lur plan. Dei fortel Kjempen kor hjelpsam, snill og venleg han er.

Kjemper har vi sett mange av, både i folkediktinga, i nyare populærkultur og i barnelitteraturen. Lesaren i målgruppa er godt kjend med både troll og monster.

Forfattaren skriv seg inn i ein skog av forteljingar vi kjenner frå før, men syner oss alt frå nye, varierande perspektiv og med ein meir moderne og myndiggjerande bodskap.

Duzakins duse, grøne og brune skogsmiljø er ikkje særleg skummelt, heller melankolsk og dystert. Fallet utfor stupet er eit markant brot i handlinga. Deretter vert det lysare, både i tekst og bilete.

Kjempen handlar om å sjå og anerkjenne det gode i andre. Det gode må seiast på mange måtar over mange sider, til det vert ei sanning for Kjempen. Boka kan bidra til at dette vert ei haldning hjå lesaren.

Janne Karin Støylen

Janne Karin Støylen er litteraturvitar og bonde.