Dokumentar

Regi: Nanette Burstein

Hillary

Med: Hillary Rodham Clinton, stab, journalistar, vener og familie
Miniserie NRK

Kvar kom ho frå, og kva skjedde på vegen fram til eit valnederlag som vart historisk i den forstand at det var fyrste gong ei kvinne såg ut til å kunna verta president i USA?

Liketil

Av og til er det særs tilfredsstillande å sjå ein streit miniserie der ein har gjort strålande arkivleiting og interessant klipping. Sjølv om eg kjenner utkoma, er Hillary såpass snedig samansett at eg sit til siste slutt og nærast heiar på henne. Om du politisk sett står langt til høgre, vil du ha lite utbyte av å sjå denne dokumentaren, for han er verkeleg i hennar favør. Og lite er meir irriterande for motstandarar enn å sjå balanserte, grundige framstillingar med truverdige kjelder og tidsvitne som dannar eit samansett bilete av, i dette tilfellet, eit levande symbol på både reell kvinnekamp og venstreorienterte verdiar. Sett med mine norske auge vert ikkje dei opplagde kapitalistiske sidene hennar framheva nok, og dei opplagde angrepa hennar på kjæledeggesosialisten Bernie Sanders verkar noko umotivert, som eit personangrep meir enn sakleg usemje. Men så er filmen amerikansk, så berre det å vera demokrat vert sett på som venstrevridd der i huset.

Ettermælet

Kva vil Hillary Rodham Clinton verta hugsa for? Sjølv om Hillary som sagt talar til hennar fordel, så peikar han også på veikskapane hennar. Som ho sjølv seier, er ho nok ei betre embetskvinne enn ein karismatisk politikar. I det spelet som er amerikansk politikk, kjem ein ikkje langt med å freista forklara kvifor utdanning ikkje over natta kan verta gratis, når det ein burde sagt, var «gratis utdanning – no!», slik til dømes Sanders gjorde. Såleis er dokumentaren også ei god innføring i kva som skjer i kulissane. Og kven eit menneske er, før det trer inn i på den politiske scena. Tjukke brilleinnfatningar, midtskil og jentenamnet vik plassen for fikse buksedressar, sminke og å vera kona til mannen. Og kor mykje har eigentleg endra seg i dag med tanke på kva som vert forventa av ei kvinne? Som samfunnshistorisk tilbakeblikk er Hillary sørgeleg dagsaktuell, eg berre kryssar fingrane for at det snart verkar foreldra.

Brit Aksnes

Brit Aksnes er frilans kulturarbeidar og fast filmmeldar i Dag og Tid.