Jazz/impro

Daniel Sommer/ Arve Henriksen/ Johannes Lundberg

Sounds & Sequences

Arve Henriksen, trompet og elektronikk; Johannes Lundberg, bass og elektronikk; Daniel Sommer, trommer.
April Records

Den danske trommeslagaren Daniel Sommer har sett seg som mål å fanga og dokumentera «nordisk improvisasjon» gjennom tre utgjevingar med tre ulike trioar. As Time Passes, med den engelske gitaristen Robert Luft og vår eigen Arild Andersen på bass, kom i april i år. På Lost Threads, som er ventande våren 2025, har han med seg den finske pianisten Artturi Rönkä og den svenske bassisten Thommy Andersson.

Sounds & Sequences blei spelt inn Epidemin studio i Göteborg gjennom tre møte frå mars 2022 til desember 2023. Trioen har testa ut mang ein idé, spelt inn mykje musikk og så teke fatt på ei kritisk utveljing. Resultatet er elleve «sekvensar» der mesteparten av stoffet står fram som heilskaplege komposisjonar. Her er ikkje spor av langhalm. Tittelen er såleis i overkant smålåten.

Sommer har hatt som mål å skapa dialog mellom dei akustiske instrumenta og elektronikken. Det målet har trioen nådd. Nokre gonger dominerer det elektroniske, som i den sfæriske og bergtakande «Skyggespill», andre gonger det akustiske, som i den sarte og lyriske «Hey, Superhero». Høgdepunktet er tittelkuttet med eit drivande samspel og Henriksen sylskarpt til stades.

Sjølv om dette er prosjektet er initiert og administrert av Sommer, er musikken resultatet av eit kollektivt arbeid. Truleg har musikken mognast og blitt klarare i forma ved at dei har teke seg god tid.

Det er ikkje uttrykk for sjåvinisme å hevda at ein del bidrag frå Henriksen er med på å løfta produksjonen. Ein kjenner han att frå første tone. Likevel evnar han å overraska og gjera noko forfriskande. Han er sjølve rosina i pølsa.

Lars Mossefinn

Lars Mossefinn er frilans journalist og fast jazzmeldar i Dag og Tid.