DRAMA

Regi: Magnus von Horn

Sweat

Med: Magdalena Kolesnik, Julian Swiezewski, Aleksandra Konieczna
Kinofilm

Sylwia (Kolesnik) har 600.000 følgjarar på Instagram. Ho leier store kollektive treningsøkter på kjøpesenter i polske storbyar. Alt skal på nett. Går ho opp trappa, eller lagar ho seg noko flytande næring, sender ho ein videosnutt til tilhengjarane.

Viktigast er det å dele kva gåver ho får frå Olympus Nutrition og den slags. Ho er ein vaskeekte fitness influencer. Vi møter henne gjennom nokre døgn med identitetskrise, bursdagsselskap hjå mora og møter med fans og kollegar. Det er intenst.

Strålefare

Regissøren Magnus von Horn kvir seg ikkje for å gå i djupna hjå figurar eg er skeptisk til. Det lukkast han stort med. Den djerve og lekre debuten Etterskjelv følgde ein ungdom som har gjort noko skrekkeleg. Sweat er fullstendig framand for ein filmmeldar utan smarttelefon som aldri har prøvd treningsstudio.

Alt Sylwia syslar med, slår meg som heilt meiningslaust. Likevel blir eg påverka og heiar på henne. Von Horn får meg med på laget med hjelpa til ei rågod Magdalena Kolesnik i hovudrolla. Ho strålar energi og uro. Formidlinga av eit ambivalent sjølvbilete er nyansert og sterk. Veksling mellom hylling til intense rytmar og stille einsemd byggjer opp forståinga av kjenslelivet til ei som ved første augekast liknar eit strigla skal.

Livet i rosa

Alt er rosa og neon. Kameraet fangar det glatte, men er tidvis ekstremt nærgåande. Det fremjar det kroppslege i jobben til Sylwia utan spekulativt blikk. Linsa kjem nesten borti neglefila. Nærbileta syner det sårbare.

Kolesnik får god bruk for ekspressive auge. Ho er høgt og lågt. Roxette riv i høgtalarane på bilen, og Sylwia peikar på seg sjølv medan ho syng «The Look». Musikkbruken er førebiletleg. Ofte gjev stilla plass til at låge lydar får sterk effekt. Mykje forstyrrar. Korkje tilbedarar, agentar eller familie dempar stress.

Svenske von Horn gjekk filmskulen i Lódz og bur i Warszawa. Han kjenner Polen. Filmen har fine polske særtrekk, men historia er like universell som ho er aktuell. Kroppspress, sosiale medium, mental helse, uønskt seksuell merksemd og einsemd er i tida. Sweat kjem med fine kommentarar om desse temaa med ei fengjande forteljing og glitrande stil. Vonleg ser både yngre og eldre filmen på kino.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.