Komedie / thriller

Regi: Cory Finley

Thoroughbreds

Med: Olivia Cooke, Anya Taylor-Joy, Paul Sparks

Amanda (Cooke) har eit forstyrrande karaktertrekk: ho føler ingenting, verken godt eller dårleg. Lily (Taylor-Joy) har eit meir gjengs karaktertrekk: Ho føler mykje, men uttrykker ingenting. Dei er barndomsveninner, men har ikkje sett kvarandre på lenge når vi først møter dei. Allereie tidleg er tonen sett i Thoroughbreds: ein mørk, humoristisk thriller som graviterer rundt den bisarre venskapen til to forskrudde jenter.

Hat

Lily hatar stefaren Mark (Sparks). Amanda blir interessert i Lilys undertrykte kjensler og ser at ho treng emosjonell livredning. Ho spør derfor Lily: Kvifor drep du ikkje berre Mark? Ført fram av Amanda går Lily gradvis inn i dei mørkaste kjenslene. Snart er dei i gang med å planlegge eit mord.

Thoroughbreds viser vondskapen i to tenåringsjenter, men gjer det på ein vittig måte. Langfilmdebutant Cory Finley er formsikker i filmspråket; kamerabruk, musikk og stemning har sjølvtillit og tyngde. Dei lange takingane, dei disharmoniske strykarane og dei mørke romma seier noko meir om personane.

Plottproblem

Det er ein vellaga, underhaldande film, med eit plottproblem: Viss Amanda er utan kjensler og empati, kvifor bryr ho seg då om å hjelpe Lily? Dette gir filmen aldri eit fullverdig svar på, og han skyv problemstillinga unna som noko ironisk som ikkje treng meir utbrodering. Det blir for enkelt. «Livet mitt er meiningslaust», seier Amanda i ei nøkkelscene. Men slutten viser at sjølv kjenslelause personar søker meining gjennom andre menneske.

Sondre Åkervik

Sondre Åkervik er frilans kulturjournalist og fast filmmeldar i Dag og Tid.